ليلة الخميس .. خروج عن النص

قوم يا راجل بلاش كسل
الليلة الخميس و بلاش ملل
يلا قوم و ما تعملش نايم
كفاية بقى نوم زى البهايم
..........................................
يا أم العيال الحيل إتهد
و أنا ما بقاش لى حد
يكسر معايا السد
و يقوى حيلى و يشد
---------------------------------
كل يوم تقول بكره
عدى الخميس و الجمعه
و أنا خلاص مش طايقه
و من كلامك انا حاسه
إنى خلاص هبقى جثة
----------------------------
يا أم العيال إفهمى
أخدوا منى كل حاجة
فبلاش بقى
فى السياسة تتكلمى
قبل ما تقولى إصحى ..
شوفى أنا نايم ليه .؟
جعان يمكن .. وله شبعان وله إيه ..؟
محتاج أرتاح يمكن .. بس الهم شايله ليه ..؟
يا أم العيال حسى .. حواليكى بصى .. الحال إتغير
العيشة بقت عذاب .. العيشة بقت نار .. و الحال إتمرر
------------------------------
ياراجل جى دلوقتى تشتكى ..
ما أنت طول عمرك شقيان
و طول عمرك بتشتهى
وله يعنى انا مش من النسوان ؟
----------------------------------------------

يا عالم يا هوووووووه
الفرح اخدووووووه
و الخميس جمركووووه
حد يقول لها الخميس ليه عملوووووه
و بعد ما عملوه خصخصوه
يعنى قبل ما أصحى
لازم أخد موافقة المأذون
والمأذون له بالحكم فينا
و لو صحيت من غير أذنه
يبقى أكيد هيجى و يربينا
--------------------------------
يا راجل انت قلت كده
كتير قبل كده
لغاية لما جيبتلك دمغة
ملزوقه على حتة ورقة
بتقول لك إصحى و فوق
و خليك راجل ذوق
و أنت تكون بالحظ مرزوق
----------------------------------
يا أم العيال الكتير
بلدنا فيها ناس كتير
بتحلم يوم واحد بس تفوق
يوم واحد بس تروق
يوم واحد .. مش كفاية
-----------------------------
يا دى الخيبة و يادى الوكسة
جوزى عمل اليوم نكسة
-----------------------------
طيب غطينى و نامى
و بلاش تزورينى فى أحلامى
كفاية هو محتل دماغى
من كام و عشرين سنة
و كان نفسى أعرف أمته
هيخرج من دى البلد
---------------------------
يا راجل ما تقولش كده
ده شايفك و سامعك أكيد
و رجالته فى كل حته مرشقه
و هتتجاب حتى لو كنت بعيد ..
-----------------------------
أستغفر الله العظيم .. هو يعنى كان ربنا
فيها إيه لما أقول كلمتين .. ده حتى ما يرضيش ربنا
ثم هو خلاص كبر و عجز .. و بكره هيفتكره ربنا
---------------------------
ربنا ما بينساش حد
و لكل شئ حد
بس أنت مش ليك حد
ولا حتى واسطه
ولا حتى غفير فى الحته
-------------------------------
الليلة و كل ليلة
هتفضل جوايا حاجة حزينة
و مش هتتغير ف ليلة
البلد و رجالتها المكسورة
--------------------------------
عندك حق
و بلاش الليلة
نام يا سى السيد
بكره نشوف حل فى الخيبة
و خليه هو السيد
اللى بيعيش خميس كل ليلة