ابن الحرام

يا ولاد يا ولاد تعالوا يا ولاد اتلموا وغنوا حكاية البنت ام خلخال

لما حبيت الواد ابو جبه وشال ...

تعالوا يا ولاد .. اول الحكاية يشبه نهايتها واللى يعتبر منها ما يخيبش خيبتها ..

يا ولاد يا ولاد تعالوا يا ولاد .. دى كانت بنت زى القمر

ولا عين شافت ولا تشبه لبشر

شافوها اهل البلد قلبهم انكسر

و كان فى البلد الواد على بتاع غية الحمام

شافها هام بيها و تخيلها فى

المنام

ولما قام قال لازم تكون من النصيب والمنال ..

تعالوا يا ولاد قربوا كمان عشان تسمعوا كمان وكمان ..

و مسك الواد على بحمامه لونها ابيض وقالها.....

روحى لها و قولى لها انى بحبها .. طارت الحمامة لفوق لفوق لغاية لما وصلت لها

ولما شافت جمالها وقعت تحت رجلها .. وماتت يا عينى عليها ..

الواد علي جرى وراح لها ..

وقال لها رمشك صاب حمامتى ودخل فى قلبها ..

يا تجيبى تمنها يا تقتلينى زيها ..

كان على غاوى يربى حمام و صوت الحمام علمه الغرام و الهيام و البنت كان قلبها ابيض زى دكر الحمام صدقته و غرقت فى حبه قوام ..

يا بختك يا على بالبنت ام خلخال ..

عدى يوم و وراه ايام وكل يوم يقول لها بكره هنقول للبلد و لا يمنع حبنا حد ونكون لبعض على سنة الله و رسوله...!

و هى صدقت ...و فى حشاها حاجة اتحركت و الواد مين

يطوله ..؟

مشيت تخبط على كل باب عشان يفتح لها ..

لحد فتح ليها ولا قلب حن لها ..

و الواد على هد غية الحمام .. وطار وبعد عنها ..

وسط عيدان الدره قعدت البنت ام خلخال تولول على اللى ضاع منها ...

وكان اغلى ما عندها يا ولداه .. الصقر ميل وحدف لها ..

حمامه ماتت تحت رجلها ..

وهى دلوقتى بتموت بفعلها..

ولا حد حاسس بيها يا ولداه ...

يا عينى جابت الولد

من غير طبيب ولا سند

و من تعبها نامت والواد جمبها ومن غير ما تحس جه الحنش ولدعه وهو فى حضنها ..

مات ابن الحرام يا ولداه ..

مات ابن بتاع الحمام وهو فى حضنها .. و الواد بتاع الغية هد غية الحمام و بنى مكانها غية حداية ...

وتوته توته فرغت الحكاية ..

يلا يا ولاد كل واحد يرمى ليا قرش فى العباية ...

مساطيل

هششششششش ..

ادخل وما تعملش صوت .

انت عايز الدخان يموت ...

دخان ايه يا صغنتوت ؟

دخان النسيان يا فتفوت ..

ادخل و خد نفس عميق ..

انسى همك يا برئ ..

خايف يتفتح لنا تحقيق ..

طول ما انت مسطول .. انت برئ .

هتعمل ايه يا غلبان ..

بلدنا مش عايزانا جدعان ..

طول ما انت جعان ..

هتفضل خارج التفكير و الحسبان ..

هو الدخان ده دخان ايه ..

و انت بتسأل ليه .. ؟

انت مش عارف ان السؤال حرم .

و اللى بيسال يبقى جرم...

بلدك عايزاك تنام و انت مطمن ..

بكره زى الزفت طين مطين ..

و الكيف على الغلابه سلطان مسلطن ..

انا مش فاهمك يا وطن .

و لا و انا فايق ولا مسطول ..

لفيتك بالعرض و بالطول ..

قالوا ليا الريس مشغول ..

هو انا كنت اطول ..

اكون ابن حمار بس مسطول..

و مين فينا المسئول ..

انا و له انت يا مخبول ..

ولا انا و لا انت ..

كل الحكاية نفس بناخده ننسى حالنا على طول ..

اه يا وجع بطنى ..

بيوجع اكتر من وجع راسى ,

و انت يا ريس ازيك ..

قاعد فى التكييف و عامل ناسى ,

هو الريس بيتكيف ..؟

بصراحة مش دارى ..

بس هو اكيد بيتسلطن ..

و ابنه معاه و العيله المالكه .

حاكمة فينا بالعافية ..

هو احنا فقرا يا سفروت ..

انت اللى بتسال يا اللى من الجوع هتموت ..؟

دنيا غلبانه و احنا المحرومين ..

عايزين نتسطل عشان نعرف احنا مين ..